Festa e familjes Mustafi nga Gostivari
Familja Mustafi kishte festë të dyfishtë të hënën. Shkodrani, djali i tyre, debutoi në Kampionat Botëror për Gjermaninë.
22 vjeçari është njeri me fat. Fillimisht ai u la jashtë listës definitive, por e mori ftesën nga përzgjedhësi Joachim Loew mrekullisht dhe pa pritur e pa kujtuar e gjeti veten në Botëror.
Sikur të mos mjaftonte kjo. Qendërmbrojtësi shqiptar nga Maqedonia nuk e kishte menduar asnjëherë që do të luante ndaj Portugalisë.
Por, një lëndim në gju i mbrojtësit Mats Hummels bëri që futbollisti i Sampdorias të futet në lojë në minutën e 73-të dhe të bëhet shqiptari i parë që luan për Gjermaninë në një eveniment aq të rëndësishëm.
Pasi portugezët ishin me një lojtar më pak, ish-futbollisti i Evertonit nuk pati shumë punë, pasi Ronaldo me shokët e mbetur në fushë ishin të parrezikshëm.
Debutimi i Shkodranit, si një ëndërr
Kur djali i tij, Shkodrani, hyri në lojë në ndeshjen e zhvilluar në Salvador, babai i tij, Kujtimi, po e përcillte ndeshjen në shtëpi, përpara televizorit, së bashku me familjen e tij në Maqedoni.
Mustafit i kishte vdekur gjyshi, 88 vjeç, të enjten e kaluar, ndërsa pas funeralit, babai i futbollistit ishte kthyer në shtëpi i mërzitur. Mirëpo, djali i tij, Shkodrani, ishte ai që ia riktheu gëzimin në fytyrën e tij.
“Mendoja se isha duke ëndërruar. Familjarët më thonë se ky është një realitet, por unë nuk mund të besoj”, ka thënë Mustafi sendor, i cili është ekspert i futbollit.
Sigurisht, për të luajtur, Mustafit iu nevojit fatkeqësia e tjetrit. Megjithatë, babai i futbollistit nuk i është gëzuar lëndimit të Hummels.
“Shpresoj se nuk është lënduar rëndë, në mënyrë që Botërori të përfundojë për të”, vijoi Kujtim Mustafi.
Ky i fundit nuk ishte befasuar kur e pa Shkodranin të futej në lojë, pasi nuk kishte shumë zgjidhje për trajnerin Loew, duke e pasur parasysh se qendërmbrojtësit tjerë ishin në fushë.
“E parashikova se do të hynte ose Shkodrani ose Matthias Ginter”, përfundoi babai i futbollistit.
Kujtimi nuk habitet nëse në ndeshjet e ardhshme, Mustafi do të luajë nga minuta e parë për Gjermaninë.
