Në muajin tetor në kinematë franceze, dhe më pas më gjerë, do të shfaqet filmi “Taken 2”, ku Neeson interpreton agjentin e tërhequr të CIA-s, Bryan Mills.
Këtë herë ai do të shpëtojë familjen e tij nga hakmarrja e bosit shqiptar Murad Hoxha, babai i personazhit Marko Hoxha që u vra në filmin e parë nga Neeson pasi i kishte rrëmbyer të bijën.
Gjithashtu, Neeson do t’i duhet të shpëtojë edhe nga njerëzit e sheikut të vrarë po në episodin e parë të sagës, në një jaht luksoz në ujërat e Senës, në Paris.
Paradoksi i filmit është se, edhe pse do të ketë sërish një bandë shqiptare, në kastin e tij nuk ka asnjë aktor shqiptar. Madje, edhe figura e bosit Murad Hoxha interpretohet nga aktori kroat me etni serbe, Rade Serbedzija.
Ky i fundit është i njohur në qarqet kinematografike evropiane, por për publikun mund të jetë më i njohur për interpretimin e oligarkut rus Ivan Tretiak në filmin “Shenjtori”, me Val Kilmer, si dhe për rolin e doktorit që shpiku virusin Kajmera në “Mission: Impossible 2”.
Filmi “Taken 2” është një prodhim francez me regjisor Oliver Megaton dhe producent të mirënjohurin Luc Besson, i cili ka shkruar edhe skenarin.
