Autoritetet në Egjipt po përgatiten për protestat të mundshme për të tretën ditë rradhazi.Qindra demonstrues kundër qeverisë janë arrestuar gjatë dy ditëve të fundit.
Dy persona të tjerë janë vrarë gjatë demonstratave anti-qeveritare në Egjipt.
Të enjten në mbrëmje nobelisti Mohamed el Baradei do të kthehet në vendin e tij.
Trazirat shtrihen
Trazirat janë përhapur edhe në qytetet e provincave, ndërsa në Suez ka patur përplasje të mëdha.
Megjithë përpjekjet e forta nga ana e qeverisë për të parandaluar protesta të tjera, kundërshtarët janë të vendosur.
Policia ka ndërhyrë shpejt për të shpërndarë grumbullimet e njerëzve.
Megjithatë në Kajro përplasjet vazhduan edhe pas mesnate.
Në qytetin Suez, qindra protestues kanë qëndruar natën në rrugë.
Ata ishin shumë të zemëruar pasi autoritetet refuzuan të lëshonin trupin e një prej tre demonstruesve të vrarë të martën dhe i vunë zjarrin një ndërtese qeveritare.
Në internet janë bërë thirrje për demonstrata të mëdha pas faljes së të premtes.
Ministria egjiptiane e Brendshme njoftoi të mërkurën se të gjitha protestat do të ndalohen.
Teknikisht të gjitha demonstratat janë të paligjshme pa lejen e qeverisë dhe opozitës kjo leje i jepet shumë rrallë.
Ky rregull është në kontrast me një deklaratë nga ministria e Jashtme egjiptiane që pretendon që vendi është i hapur për lirinë e fjalës.
