BotaLajme

Shkatërrohet rrjeti i drogës ne Arizona

Autoritetet amerikane deklarojnë se kanë shkatërruar një rrjet masiv droge të drejtuar nga një kartel meksikan në Arizona.

Në total 76 të dyshuar janë arrestuar dhe sasi të mëdha droge e armësh janë sekuestruar në një seri bastisjesh.

Zinxhiri i trafikut përdorte udhëtarë me canta si dhe automjete për të trafikuar marijuanë, kokainë dhe heroinë përmes shkretëtirës perëndimore të Arizonës.

Rrjeti ishte i lidhur me kartelin meksikan të Sinaloas dhe në pesë vitet e fundit vlerësohet të ketë fituar rreth 2 miliardë dollarë.

“Sot i kemi dhënë një goditje të rëndë ndërmarrjes kriminale meksikane që ka qenë përgjegjëse për helmimin e komunitetit tonë”, deklaroi prokurori i përgjithshëm i Arizonës, Tom Horne.

“Më duket tërësisht e papranueshme që lagjet e Arizonës të përdoren si sheshe për shpërndarjen e drogës”, ka shtuar ai.

Aksioni i policisë, i koduar me emrin “Transporti Ekspres”, u krye pas 17 muajsh hetime nga agjenci të ndryshme të zbatimit të ligjit.

Një numër i madh shtetasish amerikanë dhe meksikanë u arrestuan në tre aksione të ndryshme javën e kaluar.

Mbi 30 tonelata marijuanë, 90 kilogramë kokainë dhe 72 kilogramë heroinë u sekuestruan, si dhe 100 armë zjarri.

Leave a Reply

Your email address will not be published. Required fields are marked *

Back to top button