Prej dje, të paktën zyrtarisht, nuk ka më polici serbe në veri të Kosovës. Është mbyllur stacioni policor në Leposaviq, kurse policët janë vënë në dispozicion të MUP-it të Serbisë. Kurse kryetarja e Kuvendit Komunal të Mitrovicës së veriut, Ksenija Bozovic, i ka bërë thirrje Policisë së Kosovës që të vendos rend dhe ligj në veri për shkak të eskalimit të dhunës në atë pjesë.
Pas shpërbërjes së njësiteve të MUP-it serb në veri, disa prej këtyre policëve do të pensionohen, disa do të kalojnë në Policinë e Kosovës, kurse pjesa e mbetur do të sistemohet në policinë serbe. Fat të njëjtë brenda dy-tri ditësh do të kenë edhe policët serbë në Zveçan, veri të Mitrovicës dhe Zubin Potok.
Siç transmeton “Vesti”, serbët, përkrahës marrëveshjes së Brukselit po i nxisin bashkëkombësit e tyre që të futen në Komisionin Zgjedhor të Kosovës.
Njëkohësisht me mbylljen e stacionit policor në Leposaviq dhe me fillimin e eliminimit të strukturave serbe të sigurisë në veri të Kosovës, që është kushti kryesor i Serbisë për marrjen e datës për negociata me BE-në, kryetarja e Kuvendit Komunal të Mitrovicës së veriut, Ksenija Bozovic, i ka bërë thirrje Policisë së Kosovës që të vendos rend dhe ligj në veri, për shkak të eskalimit të dhunës në atë pjesë .
“Kërkojmë reagim të shpejtë të Policisë së Kosovës dhe EULEX-it, që të kryejnë punën e tyre në përputhje me mandatin që e kanë marrë”, thuhet në kumtesën e Ksenija Bozovicit.
Serbët nga veriu akuzojnë Beogradin për asgjësimin e strukturave ilegale, duke thënë se atë që nuk munden ta bëjnë institucionet e Kosovës dhe ato ndërkombëtare në veri, e bënë Dacici dhe Vucici.
Ndërkohë, sipas “Vesti”, serbët e veriut sërish do të dëshironin të ndodhë një intervenim i njësitit special të Policisë së Kosovës, sepse kjo do t’i bashkonte ata sërish, por shumica prej tyre besojnë se Thaçi nuk do ta përsëris gabimin e para dy viteve dhe se “tërë punën do ta kryejë vetë Beogradi”.
