Rrëfehet politikani zviceran që u pre në fyt nga shqiptarët
Në fytin e tij janë të vendosur penjtë kurse në dorë mban ende gjips.
Politikani zviceran Karl Zingrich (45) i cili është sulmuar nga dy shqiptarë të Kosovës disa ditë më parë, derisa pinte birrë me një shok, ka rrëfyer për mediat helvetike tmerrin e vdekjes që pa me sy.
Ai dyshohet se u pre në fyt nga njëri prej dy shqiptarëve të Kosovës, të cilët sipas policisë zvicerane, janë vëllezërit Jeton R (33) dhe Rasim R (31).
Policia zvicerane tashmë ka arrestuar vëllezërit shqiptarë nga Kosova që jetojnë në Zvicër derisa viktima ende gjendet në spitalin Interlaken të Zvicrës.
Pasi ka marrë një leje të posaçme, gazeta zvicerane “Blick” ka intervistuari politikanin e prerë në fyt derisa ai ende ndodhet i shtrirë në spital.
Në këtë intervistë, Karl Zingrich përshkruan ngjarjen e ditës së premte ku ai ishte viktimë e një akti të tmerrshëm.
“Pas punës unë vendosa të pi një birrë së bashku me një shok timin. 20 minuta më vonë erdhën këta të dy dhe më provokuan, ku njëri nga ta më godiste në kraharor me grushte”, ka thënë Zingrich.
“Papritmas, vetëm ndjeva nxehtësinë dhe pash rrjedhën e gjakut nga qafa ime! Në këtë çast u përpoqa të godas personin i cili më shkaktoi këtë plagë, mirëpo nuk munda, ngase ai më kishte goditur për herën e dytë dhe më kishte prerë në dorë”, ka rrëfyer politikani zviceran ngjarjen e cila tronditi opinionin e atjeshëm.
“Ata u larguan ndërsa unë mendova vetëm si te arrijë deri në spital. Falënderoj mikun tim Roland Gehrig i cili menjëherë më vendosi në veturën e tij dhe më dërgoj në spital”, është shprehur ai.
Ndërkohë, në lidhje me këtë ngjarje, babai i dy vëllezërve të arrestuar, Rrahman R (70) ka deklaruar se fajin për tërë këtë që ka ndodhur e ka alkooli.
“Ah, ai jeton ende! Kjo është mirë. Paskemi pasur fat, që ai nuk ka vdekur”, citohet të ketë thënë Rahman. R.
“Alkooli është fajtor”, ka thënë ai. “Kur ata janë të dehur, nuk kontrollojnë veten e vet. Të dytë ishin dërguar në spital të dehur. Të gjitha problemet fillojnë nga alkooli”, ka deklaruar babai i dy kosovarëve.
Përndryshe, që të dy kosovarët e arrestuar, Jeton dhe Rasim. R janë familjarë dhe kanë fëmijë.
